पायांवर डोके ठेवून परस्परांना नमस्कार करण्याची पद्धत रूढ असली आहे. पण ते खरोखरीच निरहंकारी वृत्तीनें घडते काय? ज्याच्या पायावर डोके ठेवून नमस्कार करावयाचा, त्याच्या विषयीं नमस्कार करणाराच्या अंतःकरणांत जर द्वेष, मत्सर, निंद्यतेची भावना असेल तर पायावर डोके ठेवणे या क्रियेला कांहीं अर्थ राहात नाहीं. पाय हे शरीरावयवामध्ये निकृष्ट. डोके हे शरीरावयवांमध्यें उत्कृष्ट. म्हणून त्याला उत्तमांग असें म्हणतात. माझें हें मस्तकहि तुमच्या पायांपेक्षा कमी योग्यतेचें आहे, अशी परमादराची भावना वंदनकर्त्याच्या मनांत असावयास हवी. पण तशी बहुधा नसते. त्यामुळे असा हा नमस्कार एक उपचार मात्र ठरतो.
